Prezident a wiceprezidenća

Prezident krajneho sejma je najwyši reprezentant parlamenta. Wón zastupuje krajny sejm dowonka, je potajkim mjezwočo a hłós parlamenta. Swoje zastojnstwo wjedźe wón njestroniće a sprawnje.

Prezident a jeho zastupjerjo – wiceprezidenća – wola so na spočatku legislaturneje periody wot krajneho sejma. Z lěta 2009 steji dr. Matthias Rößler jako prezident na čole Sakskeho krajneho sejma. Jemu poboku steja dwě wiceprezidentce a jedyn wiceprezident.

Prezident

• zwoła posedźenja krajneho sejma a nawjeduje tute. Při tym stara so wo to, zo so jednanski porjad dodźerži. Jeho podpěrujetaj stajnje dwaj protokolantaj.
• dźiwa na dostojnosć kaž tež prawa krajneho sejma.
• wukonja w twarjenju krajneho sejma domjace prawo a policajsku móc.
• rjaduje hospodarske naležnosće krajneho sejma po předpodaćach etatoweho zakonja.
• je zamołwity za słužbny wobchad krajneho sejma, na př. ze statnym knježerstwom.