Nadawki

Zakonje wobzamkować

Sakski krajny sejm rozsudźi wo wšěch zakonjach, kotrež padnu do kompetencneho wobłuka Swobodneho stata Sakskeje. Tole wopřijima na př. šulski a kubłanski wobłuk a policajske prawo.
Zapósłancy wobzamkuja etat kraja.

Prawo, krajnemu sejmej naćiski zakonja předpołožić, přisteji frakcijam, šěsć abo wjace zapósłancam, statnemu knježerstwu a ludej přez ludowy namjet.

Krajny sejm wobzamkuje přez połnozhromadźiznu - plenum - zasadnje w zjawnym posedźenju. Plenum je zdobom forum za zjawnu debatu, za wažne politiske wuprajenja jednotliwych zapósłancow, frakcijow a statneho knježerstwa.

Sakski krajny sejm woli nimo swójskich reprezentantow kaž prezidenta a wiceprezidentow wulku ličbu dalšich wosobow.

Ministerski prezident:

Wusahowacy wuznam ma při tym wólba ministerskeho prezidenta. Tutoho woli krajny sejm z wjetšinu swojich čłonow bjez debaty w tajnym wothłosowanju. Ministerski prezident powołuje a pušća statnych ministrow a statnych sekretarow a postaja swojeho zastupjerja.

Sakske wustawowe sudnistwo:

Krajny sejm woli z dwěmaj třećinomaj swojich sobustawow čłonow Sakskeho wustawoweho sudnistwa. Wustawowe sudnistwo je wustawowy organ, kotryž je runoprawny z krajnym sejmom a statnym knježerstwom. Wone rozsudźa mj. dr. we wustawoprawniskich zwadach mjez wustawowymi organami a wo přezjednosći krajnych zakonjow ze sakskej wustawu.

Sakski krajny sejm kontroluje dźěło statneho knježerstwa.

Zapósłancam steja za to wšelake instrumenty a postupowanja k dispoziciji, na př.:

Małe naprašowanja:

Wšitcy zapósłancy smědźa pisomne naprašowanja na statne knježerstwo stajeć, na kotrež dyrbi so – hač na mało wuwzaćow – wotmołwić. Małe naprašowanja so nadpřerěznje husto wot zapósłancow opozicije wužiwaja.

Naprašowanje statneho knježerstwa:

W kóždym plenarnym tydźenju maja zapósłancy móžnosć, so jednoho čłona statneho knježerstwa w parlamenće naprašować. Znajmjeńša jónu wob lěto staja so ministerski prezident naprašowanju.

Přepytowanske wuběrki:

Wone zasadźa so wot parlamenta na próstwu pjećiny zapósłancow za přepytowanje wěstych wobstejnosćow, kotrychž wujasnjenje leži w zjawnym zajimje.

Wuznamna je tež funkcija krajneho sejma jako zjawny politiski forum swobodneho stata. Tule maja so po móžnosći mnohorazne měnjenja wuprajić a k namakanju politiskich rozsudow přinošować. Zdobom maja so w Sakskim krajnym sejmje w ludźe wobstejace měnjenja zwuraznić.

 Wobydlerki a wobydlerjo, přizjewjene skupiny wopytowarjow kaž tež zastupjerjo medijow móžeja plenarne posedźenja z wopytowarskeje tribuny sćěhować (informacije za wopytowarjow). Tule namaka hač do 150 ludźi městno. Krajny sejm móže zjawnosć jenož z wjetšinu dweju třećinow w jednotliwych padach wuzamknyć.

Lobby před plenarnej žurlu słuži zapósłancam, čłonam statneho knježerstwa kaž tež žurnalistam jako městnosć schadźowanja za rozmołwy a interviewy.